Viltu kvarta til Barnaverndarstofu, skjóta máli þínu til kærunefndar barnaverndarmála eða til dómstóla?

Kvörtun til Barnaverndarstofu skv barnaverndarlögum.

Barnaverndarstofa getur, á grundvelli kvartana eða annarra upplýsinga sem henni berast um meðferð einstakra mála og ef hún telur ástæðu til, aflað nauðsynlegra gagna, upplýsinga og skýringa hjá viðkomandi barnaverndarnefnd. Telji Barnaverndarstofa, eftir að hafa aflað upplýsinga og skýringa skv. 2. og 3. mgr., að barnaverndarnefnd fari ekki að lögum við rækslu starfa sinna skal hún eftir því sem tilefni er til leiðbeina barnaverndarnefnd um málsmeðferð og beina til hennar ábendingum um það sem betur má fara. Ef barnaverndarnefnd fer ekki að ábendingum og leiðbeiningum Barnaverndarstofu getur stofan áminnt nefndina um að rækja skyldur sínar. Barnaverndarstofa skal gera sveitarstjórn og ráðuneytinu aðvart um slíka áminningu. Gæta skal ákvæða um trúnaðarskyldu þegar áminning er tilkynnt til sveitarstjórnar. Vanræki sveitarstjórn þær skyldur er hvíla á sveitarfélaginu getur ráðuneytið beitt sér fyrir því að gripið verði til úrræða samkvæmt ákvæðum sveitarstjórnarlaga.

Hverju er hægt að kvarta yfir?
Hver sem er getur komið kvörtun á framfæri við Barnaverndarstofu vegna ákvarðana barnaverndarnefnda. Lögð er áhersla á að fá kvartanir skriflega. Þegar kvörtun vegna tiltekins barnaverndarmáls berst, skoðar Barnaverndarstofa hvort vinnsla málsins hjá þeirri nefnd sem vann málið er í samræmi við þær kröfur sem gerðar eru í lögum og og sendir aðilum máls og viðkomandi barnaverndarnefnd niðurstöður sínar. Aðrir en aðilar máls fá hvorki upplýsingar um málið né niðurstöður Barnaverndarstofu vegna ákvæða laga um þagnarskyldu. Hlutverk stofunnar felst þannig í því að skoða hvernig málsmeðferðinni var háttað en endurskoðar ekki þær ákvarðanir sem teknar hafa verið. Barnaverndarstofa hefur jafnframt ekki heimildir samkvæmt lögum til þess að grípa með beinum hætti inn í einstaka mál sem til vinnslu eru hjá barnaverndarnefndum eða taka ákvarðanir í einstaka málum. Ef barnaverndarlög gera ráð fyrir að hægt sé að kæra ákvörðun til kærunefndar barnaverndarmála eða bera ákvörðun undir dóm er ekki hægt að leita til stofunnar vegna þess þáttar málsins heldur verður að leita til beint til kærunefndar eða dómstóla vegna þess þáttar málsins, eftir því sem við á hverju sinni. Ekki er hægt að kvarta yfir vinnulagi barnaverndarnefnda vegna verkefna sem eru unnin samkvæmt öðrum lögum, s.s. barnalögum eða lögum um ættleiðingar.

prentahnappur
Með því að smella á hnappinn hér til vinstri getur þú fyllt út og prentað eyðublað til að kvarta yfir vegna ákvarðana barnaverndarnefnda sem þú svo sendir til Barnaverndarstofu í pósti. Þú getur líka prentað það út og fyllt það út skriflega.

 

Málskot til kærunefndar barnaverndarmála
Heimilt er að skjóta úrskurðum og einstökum ákvörðunum barnaverndarnefnda og Barnaverndarstofu til kærunefndar barnaverndarmála og er kærufrestur fjórar vikur frá því að aðila máls barst vitneskja um ákvörðun.

Samkvæmt 6. gr. barnaverndarlaga er m.a. hægt að skjóta til kærunefndar ákvörðunum samkvæmt eftirtöldum greinum barnaverndarlaga:
19. gr. um nafnleynd tilkynnanda, 23. gr. um áætlun um meðferð máls, 25. gr. um úrræði utan heimilis með samþykki foreldra og barns, 26. gr. um úrræði án samþykkis foreldra, 67. gr. b. um val á fósturforeldrum, 74. gr. um umgengni í fóstri og 74. gr. a. um brotaþola.
Hægt er að lesa nánar um málskotsréttinn í 51. gr. barnaverndarlaga.

 51. gr. Málskot.

Hér er heimasíða úrskurðarnefndar velferðarmála

Málskot til héraðsdóms:
Foreldrum eða barni sem náð hefur 15 ára aldri er heimilt að bera úrskurð barnaverndarnefndar um vistun barns utan heimilis skv 27 gr barnaverndarlaga undir héraðsdómara. 27. gr. Krafa þess efnis skal berast dómara innan fjögurra vikna frá því að úrskurður var kveðinn upp. Málskot til dómstóla kemur ekki í veg fyrir að úrskurður barnaverndarnefndar komi til framkvæmda.

Styrkur til að greiða fyrir lögmannsaðstoð
Samkvæmt 2. mgr. 46. gr. bvl. skal barnaverndarnefnd veita foreldrum og barni sem er aðili máls fjárstyrk til að greiða fyrir lögmannsaðstoð áður en barnaverndarnefnd kveður upp úrskurð. Í einhverjum tilvikum velja foreldrar að leita lögmannsaðstoðar fljótlega eftir að barnaverndarmál fer í gang og spurning getur vaknað um rétt til að fá styrk ef ekki er gripið til þvingunarúrræðis í málinu. Þótt foreldri geti þótt stuðningur af því að hafa lögmann sér til aðstoðar meðan mál er í könnun eða við gerð áætlunar um stuðningsúrræði er barnaverndarnefnd ekki skylt að veita styrk til að greiða fyrir lögmannsaðstoð í þessum tilvikum. Ef að niðurstaða könnunar felur hins vegar í sér tillögu um beitingu þvingunar eða gerð er einhliða áætlun um beitingu þvingunar þá er alla jafna rétt að gera ráð fyrir að unnt sé að sækja um styrk, jafnvel þó máli ljúki svo síðar með því að samvinna takist um stuðningsúrræði.

Styrk skal veita í samræmi við reglur sem barnaverndarnefnd setur og í reglunum skal taka tillit til efnahags foreldra, eðlis og umfangs málsins. Markmið þessa ákvæðis er að fjárhagur manna hindri þá ekki í að njóta lögmannsaðstoðar og verður mat á fjárhag viðkomandi að ráða mestu um hvort styrkur sé veittur og einnig hversu hár hann skuli vera. Þannig er óheimilt við ákvörðun styrks að meta hvort barnaverndarnefnd telji málarekstur þjóna hagsmunum barns eða ekki. Í reglum barnaverndarnefndar er óheimilt að takmarka rétt aðila til að fá styrk með því að krefjast þess að samið sé um fjárhæð fyrirfram eða með því að setja reglur um hámarksfjárhæðir styrks. Í reglunum skal einungis setja fram viðmið sem leiða til samræmis í framkvæmd og skilvirkni, svo sem um hvaða gögn eiga að fylgja umsókn um styrk. Barnaverndarnefnd verður svo að fjalla um hvert mál fyrir sig en grundvallaratriði við ákvörðun um fjárhæð styrks er mat á hæfilegu vinnuframlagi lögmanns við að gæta hagsmuna aðila í tilteknu máli. Við mat á því má kalla eftir rökstuðningi fyrir kröfu um ákveðinn styrk og almennum upplýsingum um í hverju vinnuframlag lögmannsins hafi verið fólgið. Rétt er að taka fram að styrkur er svo veittur aðilanum sjálfum sem sér um að greiða þann reikning sem lögmaður gerir aðila.

Til baka


Útlit síðu:

Language