Börn eiga rétt á vernd og umönnun á ferð um landið sem og í heimabyggð

27. júlí 2009

Sumarið er tíminn þar sem flestir njóta þess að taka frí frá vinnu og hversdagsleika en ferðalög, ættarmót, heimsóknir og grill taka við. Ferðinni er gjarna heitið í sveitina til að njóta náttúrunnar og slaka á með fjölskyldunni og kappkosta tjaldstæði víða um land að þjónusta ferðamenn sem best.

Vert er að minna á það að börn eru á ábyrgð foreldra sinna og ung börn ekki fær um að sjá um sig sjálf á tjaldstæði fremur en annars staðar. Þá gilda reglur um útivist barna á tjaldstæðum sem og annars staðar. Af og til koma því miður upp tilvik þar sem ung börn eru ein á ferð og árvökulir tjaldgestir lenda í erfiðleikum með að hafa uppi á foreldrum. Í sumum tilvikum reynast foreldrar ófærir um að annast börn sín sökum ölvunarástands.

Í þeim tilvikum þar sem foreldrar vanrækja umsjá og eftirlit barna sinna á að hafa samband við 1-1-2 þar eru neyðarverðir sem taka við tilkynningum í umboði barnaverndarnefnda. Neyðarverðir 1-1-2 geta kallað út starfsmann barnaverndarnefndar í viðkomandi sveitarfélagi sem gerir viðeigandi ráðstafanir til að tryggja öryggi barnsins. Hringdu – þótt þú sért í vafa!
Til baka


Útlit síðu:

Language