Starfsdagur Barnaverndarstofu og félagsmálastjóra

25. febrúar 2009

Föstudaginn 20. febrúar sl. efndi Barnaverndarstofa til starfsdags með félagsmálastjórum og yfirmönnum barnaverndarstarfs á vegum barnaverndarnefnda. Fundurinn var haldinn í fundarsal Barnaverndarstofu og tókst mjög vel. Alls mættu 35 félagsmálastjórar og starfsmenn barnaverndarnefnda víðsvegar af landinu.

Farið var yfir nýtt skipulag Barnaverndarstofu, yfirlit yfir verkefni síðasta árs og verkefni framundan. Auk þess voru kynntar hugmyndir að breytingum í starfi Stuðla sem mun á árinu 2009 einkennast af sveigjanleika og aukinni eftirmeðferð. Fjallað var um fjölkerfameðferð (MST) en meðferðinni sinnir teymi skipað þremur sálfræðingum og einum félagsráðgjafa auk teymisstjóra sem er sálfræðingur. Frá því í nóvember 2008 hafa alls 18 fjölskyldur notið fjölkerfameðferðar og eftirspurn hefur verið stöðug. Stefnt er að því að fara af stað með annað teymi í lok ársins.

Umræður sköpuðust um vinnslu barnaverndarmála og úrræði á vegum sveitarfélaga og ríkis. Einkum var rætt um meðferðarheimili á vegum Barnaverndarstofu og staðsetningu þeirra.

Efnahagsþrengingar og áhrif þeirra á barnaverndarstarf voru í brennidepli og kynntu fulltrúar Akureyrar, Árborgar og Reykjavíkur stöðu mála og þær aðgerðir sem sveitarfélögin hafa farið af stað með til að standa vörð um velferð barna.

Í lok dags voru kynntar niðurstöður rannsóknar á barnaverndartilkynningum er varða líkamlegt ofbeldi gagnvart börnum.

Dagskrá fundarins má sjá hér en auk þess má nálgast glærur Braga, Guðrúnar og Ragnheiðar.
Til baka


Language