Samstarf í almannaþágu

9. febrúar 2011

Um eitt hundrað starfsmenn og sjálfboðaliðar í öryggis- og neyðarþjónustu af öllu landinu koma saman til fundar í tilefni af 112-deginum sem að venju er haldinn 11. febrúar. Fundurinn verður haldinn á Grand Hótel Reykjavík fimmtudaginn 10. febrúar kl. 13-17. Markmið hans er að ræða framtíðarskipan öryggis- og neyðarþjónustu og hvernig þjónustan verði best sniðin að þörfum almennings. Fundurinn verður með þjóðfundarsniði til að tryggja virka þátttöku allra fundarmanna. Fundur af þessu tagi hefur aldrei áður verið haldinn í tengslum við þessa mikilvægu þjónustu.

Þátttakendur á fundinum koma hvaðanæva af landinu og úr öllum greinum öryggis- og neyðarþjónustu, háir sem lágir. Þar verða lögreglumenn, slökkviliðs- og sjúkraflutningamenn, starfsfólk heilbrigðisþjónustu, barnaverndar, 112, Landhelgisgæslunnar og starfsfólk og sjálfboðaliðar frá Rauða krossinum og Slysavarnafélaginu Landsbjörgu.

Meginniðurstöður fundarins verða kynntar við dagskrá sem haldin verður í Björgunarmiðstöðinni Skógarhlíð á 112-daginn, föstudaginn 11. febrúar, kl. 14. Innanríkisráðherra og velferðarráðherra munu taka þátt í kynningu niðurstaðna fundarins. Á dagskránni þann 11. febrúar eru auk þess útnefning skyndihjálparmanns Rauða krossins, veiting verðlauna fyrir þátttöku í Eldvarnagetrauninni 2010 og viðurkenning til handa neyðarverði 112 fyrir framúrskarandi frammistöðu í starfi á síðasta ári.
Til baka


Language