Breytt fyrirkomulag á málstofum um barnavernd

17. janúar 2013

Ákveðið hefur verið í samráði við samstarfsaðila að hætta með mánaðarlegar málstofur Barnaverndarstofu. Þess í stað verður haldin fræðslu- og umræðudagur fyrir starfsfólk barnaverndarnefnda einu sinni að vori og hausti.

Frá árinu 2004 hefur Barnaverndarstofa staðið fyrir mánaðarlegum málstofum um barnavernd í samstarfi við Barnavernd Reykjavíkur og félagsráðgjafardeild Háskóla Íslands. Félagsmálaráðuneytið kom að samstarfinu á tímabili og fagdeild félagsráðgjafa í barnavernd hefur komið að samstarfinu frá því árið 2011. Málstofurnar hafa almennt verið vel sóttar af ólíkum faghópum en þátttaka barnaverndarstarfsmanna hefur verið mismikil. Til að þjóna landsbyggðini eru upptökur af flest öllum málstofum aðgengilegar á vefsíðu Barnaverndarstofu.
Á undanförnum árum hefur framboð um mánaðarlega fræðslu aukist, s.s. málstofur á vegum Rannsóknastofnunar um barna- og fjölskylduvernd og morgunverðarfundir Náum áttum sem Barnaverndarstofa er aðili að. Markmið með málstofum um barnavernd er að koma fræðslu á framfæri við starfsfólk barnaverndarnefnda sem hefur oft á tíðum átt erfitt með að sækja þær. Því hefur verið ákveðið að breyta fyrirkomulaginu og hætta með mánaðarlegar málstofur. Þess í stað verður haldin fræðslu- og umræðudagur fyrir starfsfólk barnaverndarnefnda einu sinni að vori og hausti. Hvað varðar fræðslu fyrir aðra hópa er áformað að standa fyrir árlegum ráðstefnum um barnavernd í samstarfi við ofangreinda aðila.

Til baka


Language