112 dagurinn 2013

112 er neyðarnúmer barnaverndarnefnda

8. febrúar 2013

Auglysing112 Þann 11. febrúar er 112 - dagurinn haldinn í fjölmörgum Evrópulöndum. Að þessu sinni er sjónum beint að getu almennings til þess að bregðast við á vettvangi alvarlegra slysa og veikinda, að fólk hringi í 112 og veiti fyrstu aðstoð áður en sérhæfð aðstoð berst. Einnig að vekja athygli almennings á að 112 er ekki bara neyðarnúmerið hér heima heldur einnig í löndum Evrópu.
112- dagurinn er samstarfsverkefni stofnana og félagasamtaka sem annast margvíslega neyðarþjónustu, almannavarnir og barnavernd í landinu. Þau eru Barnaverndarstofa, Embætti landlæknis, Isavia, Landhelgisgæslan, Landssamband slökkviliðs- og sjúkraflutningamanna, Mannvirkjastofnun, Rauði krossinn, Ríkislögreglustjórinn, Slysavarnafélagið Landsbjörg, Slökkvilið höfuðborgarsvæðisins og samstarfsaðilar um allt land.

Samstarfsaðilar hafa undirbúið ýmsar aðgerðir til þess að vekja athygli á deginum og efni hans. Gerð hefur verið könnun á þekkingu almennings á skyndihjálp þar sem fram kemur að þeir sem hafa sótt námskeið eru líklegri til að veita fyrstu hjálp, sjá nánar helstu niðurstöður könnunarinnar. Smelltu hér til að taka skyndihjálpar prófið og átta þig á skyndihjálparkunnáttu þinni. Þá er dagurinn kynntur með ýmsu móti í fjölmiðlum, fræðsla um slysavarnir og skyndihjálp fer fram í skólum í tengslum við daginn og móttaka er í Björgunarmiðstöðinni Skógarhlíð í tilefni dagsins. Þar verður skyndihjálparmaður ársins útnefndur, veitt verða verðlaun í Eldvarnagetrauninni og tilkynnt verður um neyðarvörð ársins. Sem fyrr er lögð mikil áhersla á að 112-dagurinn nái til landsins alls. Því hafa viðbragðsaðilar á hverju svæði verið hvattir til að ræða saman um hugsanlegar aðgerðir vegna dagsins.

Í ljósi þess að 112 er neyðarnúmer barnaverndarnefnda landsins er ástæða til að vekja athygli á tilkynningaskyldunni og upplýsa almenning um það hvert er hægt að leita þegar velferð barns er í húfi. Mikilvægt er að börn og foreldrar viti hvert á að leita þegar grunur er um vanrækslu eða ofbeldi gagnvart barni. Í því skyni hefur verið útbúið veggspjald til að dreifa í leik- og grunnskóla, heilsugæslu og á aðra þá staði sem veita þjónustu fyrir börn og fjölskyldur. Hér má nálgast veggspjaldið.

Til baka


Language