Fjölgun mála í Barnahúsi
Það sem af er árinu hafa verið tekin rannsóknarviðtöl við 40 börn í Barnahúsi.Það er 19 börnum meira en á sama tíma í fyrra. Af þessum 40 börnum hafa 15 börn komið í skýrslutöku fyrir dómi en 25 börn í könnunarviðtöl fyrir barnaverndarnefndir. Á sama tíma í fyrra höfðu einungis 8 börn komið í skýrslutöku fyrir dómi. Þess ber að geta að aldrei höfðu komið jafn mörg börn á einu ári í Barnahús eins og árið 2002 en þá komu 167 börn í rannsóknarviðtal, þar af 60 börn í skýrslutöku fyrir dómi. Að auki hefur sérfræðingur frá Barnahúsi verið kallaður til að taka skýrslur af fjórum börnum í dómhúsi það sem af er þessu ári. Fyrir héraðsdóm Norðurlands eystra á Akureyri í þremur tilvikum og í héraðsdómi Reykjavíkur í einu tilviki. Í þessum dómhúsum er sérstakur búnaður til skýrslutaka af börnum. Á árinu 2002 tóku sérfræðingar Barnahúss alls sjö skýrslur í dómhúsum, þrjár í Reykjavík og fjórar fyrir norðan. Það virðist því enn vera að færast í aukana að sérfræðingar Barnahúss séu fengnir til að taka skýrslur fyrir dómi af börnum, sérstaklega í Barnahúsi en einnig í sumum tilvikum í dómhúsi. Barnahús sinnir að auki greiningu og meðferð fyrir þolendur kynferðisafbrota á landinu öllu og eru, þegar þetta er skrifað 90 börn sem fá þá þjónustu.