Reglugerð um málsmeðferð fyrir barnaverndarnefndir

2 feb. 2004

Nýju barnaverndarlögin nr. 80/2002 gera ráð fyrir að félagsmálaráðuneytið setji nokkrar reglugerðir að fengnum tillögum Barnaverndarstofu. Stofan ákvað að setja saman starfshóp til að vinna að þessu verkefni svo fá mætti inn þau fjölmörgu sjónarmið sem nauðsynlegt er að taka tillit til við nánari útfærslu laganna. Leitað var eftir tilnefningum frá Samtökum félagsmálastjóra á Íslandi og Barnavernd Reykjavíkur og hafa Hjördís Hjartardóttir félagsmálastjóri og starfsmaður Barnaverndarnefndar Borgarfjarðar og Guðrún Frímannsdóttir framkvæmdarstjóri Barnaverndar Reykjavíkur unnið að því að semja reglugerðardrög ásamt starfsmönnum Barnaverndarstofu. Nú hefur fyrsta reglugerðin litið dagsins ljós, nr. 56/2004 um málsmeðferð fyrir barnaverndarnefnd. Í reglugerðinni er fjallað um fjölmörg atriði sem tengjast málsmeðferð, svo sem skráningu tilkynninga til barnaverndarnefndar, könnun barnaverndarmáls, gerð áætlana, hlutverk talsmanns og skráningu og meðferð persónuupplýsinga hjá barnaverndarnefnd.