Réttargæslumaður neitar skýrslutöku í héraðsdómi Reykjavíkur
Í fréttum ríkisútvarpsins í dag, miðvikudaginn 18. febrúar kemur fram að réttargæslumaður 5 ára drengs sem grunur leikur á að hafi verið beittur alvarlegu kynferðisofbeldi hafi í morgun neitað í héraðsdómi Reykjavíkur að skýrsla yrði tekin af drengnum þar. Réttargæslumaðurinn telur að hagsmunum drengsins sé betur borgið í Barnahúsi.Réttargæslumaðurinn, Sif Konráðsdóttir lögmaður, krafðist þess í héraðsdómi í morgun að dómarinn, Sigríður Ingvarsdóttir, úrskurðaði formlega um hvar skýrslutakan fari fram. Málið var tekið fyrir rétt fyrir hádegi og er úrskurðurinn ekki fallinn. Fyrir nokkrum árum var nokkur deila um hvort betra væri að skýrslutökur í slíkum tilvikum væru teknar í Barnahúsi eða hjá dómstólum. Síðan hefur að því er virðist tekist gott samstarf milli Barnahúss og allra dómstólanna nema héraðsdóms Reykjavíkur. Á síðasta ári voru t.d. aðeins teknar skýrslur af tveimur börnum í Barnahúsi að ósk dómara í Reykjavík.
Réttargæslumaður drengsins sem kallaður var í dómhúsið í morgun telur mestu skipta að í Barnahúsi sé sérþjálfað kunnáttufólk í að tala við börn og umgjör skýrslutökunnar sé allt önnur í opinberu dómhúsi en í Barnahúsi þar sem aðstæður séu heimilislegar. (heimild: www.ruv.is)
