Saga barnaverndar
Barnaverndarstofa hefur lengi ráðgert að láta skrifa sögu barnaverndar á Íslandi. Eftir norrænu barnaverndarráðstefnuna, sem haldin var hér á landi í ágúst 2003 var ákveðið að nota ágóðann af henni til að hefja þá vinnu.Jón Þ. Þór, Fil.dr. hefur verið ráðinn til verksins. Jón lauk Cand. mag. prófi í sagnfræði frá Háskóla Íslands árið 1972 og Fil. dr. í hagsögu frá Gautaborgarháskóla árið 1995. Auk greina, ritgerða og ótal annarra fræðistarfa hefur Jón skrifað fjölda bóka um sagnfræði, m.a:. Sögu Ísafjarðar 1 – 1V, 1984 – 1990; Ránargull, yfirlit yfir sögu fiskveiða á Íslandi frá landnámsöld til skuttogaraaldar, 1997; Uppgangsár og barningsskeið. 2. bindi Sögu sjávarútvegs á Íslandi, 2003 og í ár er væntanleg Dr. Valtýr – Ævisaga og Saga Bolungarvíkur, 1. bindi.
Við ritun sögunnar verður lögð megináhersla á tímabilið frá því fyrstu barnaverndarlögin gengu í gildi hér á landi árið 1932 og fram til ársins 2007. Saga barna og barnaverndar á Íslandi verður þannig meginefni bókarinnar, en einnig verður litið til annarra landa, einkum Norðurlanda, til samanburðar eftir því sem þurfa þykir.
Komið verður á fót ritnefnd sérfróðra manna, sem mun aðstoða höfund, benda á heimildir og annast yfirlestur á handriti.
Gert er ráð fyrir að ritið komi út í apríl 2007, en þá eru 75 ár liðin frá gildistöku fyrstu barnaverndarlaganna.