MST ráðstefna 12 maí nk
Ráðstefna um MST verður haldin 12.maí nk á Hótel Loftleiðum. MST er aðferð sem hefur verið þróuð við læknaháskólann í Charleston í Suður Karólínu í Bandaríkjunum. Aðferðin sem gengur undir vinnuheitinu “fjölbragðaglíma” en á ensku Multi Systemic Therapy (skammstöfun MST) er beitt til þess að fást við óæskilega (andfélagslega) hegðun unglinga svo sem vegna afbrota, útigangs, umgengni við óæskilega félagahópa, skróp í skóla o.s.frv. Á ráðstefnunni mun Scott Henggeler sem er einn af upphafsmönnum MST kynna hvernig aðferðin festi rætur í Bandaríkjunum, fjalla um þá hugmyndafræði sem að baki aðferðinni býr. Þá mun hann gera grein fyrir þeirri matstækni sem þróuð hefur verið samhliða til að meta árangur MST. Hið síðastnefnda þykir mikill styrkur aðferðarinnar enda eru gerðar ríkulegar kröfur í þeim efnum sem og um árangur. Eftir efni og aðstæðum mun Henggeler taka dæmi um meðferð barna.Terje Ogden frá Noregi sem hefur haft yfirumsjón með framkvæmd MST aðferðarinnar þar í landi sem náð hefur útbreiðslu um gervallan Noreg, mun m.a. fjalla um framkvæmdina þar í landi, m.a. hvað varðar menningarleg atriði sem fást þarf við og annan undirbúning. Hann mun einnig segja frá því hvernig mat á aðferðinni hefur farið fram í Noregi.
Cynthia Swenson mun greina frá því hvernig MST aðferðinni hefur verið beitt til þess að koma til móts við þarfir þeirra barna sem gjarnan eru skjólstæðingar barnaverndaryfirvalda. Þetta umfjöllunarefni mun væntanlega höfða mjög til þeirra sem veita þeim börnum aðstoð sem eiga í vanda vegna vanrækslu og illrar meðferðar.
Fyrirlesarinn Melisa Rowland mun beina sjónum að þeim skjólstæðingum sem gjarnan eru viðfangsefni geðheilbrigðisstofnana, eiga með öðrum orðum við geðrænan vanda að etja, kvíða, þunglyndi, geðröskum o.sfrv. Hún mun einnig víkja að möguleikum þess að beita MST aðferðinni gagnvart þeim sem komist hafa í kast við lög, ef til vill sökum geðræns ástands.
Í sérstakri auglýsingu á þessari heimasíðu er getið starfstitils allra fyrirlesara. Þá má finna að neðan tengla sem leiðir til eldri fréttar á heimasíðu Barnaverndarstofu um MST aðferðina. Síðast en ekki síst má tengjast heimasíðu Adfersentret í Ósló sem annast rannsóknir um MST í Noregi. Á þeirri síðu má svo rekja sig áfram til fjölda tengla þar sem fá má upplýsingar um hvaðeina sem snertir MST aðferðina.
Hægt er að skrá sig á ráðstefnuna með því að senda upplýsingar í tölvupósti til herdis@bvs.is
Auglýsing
Eldri frétt um MST
MST í Noregi
Dagskrá
