MST teymi ýtt úr vör
Í dag 12. nóvember hefur MST-teymi Barnaverndarstofu formlega störf. Eins og fram hefur komið er um að ræða fjóra þerapista og einn teymisstjóra og er starfsháttum teymisins lýst undir MST krækju á þessari heimasíðu. Gengið hefur verið frá markmiðum og leiðbeiningum fyrir MST á Íslandi sem nýtast einnig barnaverndarstarfsmönnum til upplýsingar um markhóp, umsóknarskilyrði, mat á árangri o.s.fv. Nú þegar eru komnar vel á annan tug umsókna frá barnaverndarnefndum á höfuðborgarsvæðinu í MST-meðferð. Teymið getur sinnt 16-20 fjölskyldum í einu og er gert ráð fyrir að meðferðartíminn verði á bilinu 3-5 mánuðir. Í byrjun verður farið af stað með færri skjólstæðinga meðan starfsmenn æfast í MST-aðferðinni (greiningarvinnu, skilgreiningu inngripa og samhæfingu við MST-sérfræðing) en stefnt er að fullum afköstum teymisins uppúr áramótum.Formleg þjálfun teymisins fór fram hér á landi dagana 3.-7. nóvember sl. Þjálfarar voru Joanne Penman og Lori Moore frá Bandaríkjunum en sú síðarnefnda verður einnig MST-sérfræðingur okkar hér á landi. Í framhaldi af vikulegri faghandleiðslu teymisstjórans með teyminu, sem tekur 1,5-2 klukkustundir, er klukkustundar langur símafundur teymisins (þerapista og teymisstjóra) með MST-sérfræðingi þar sem farið er aftur yfir öll mál teymisins. Lori Moore er einnig MST-sérfræðingur fyrir nokkur teymi í norður-Englandi og mun hitta íslenska teymið ársfjórðungslega í svokallaðri booster-þjálfun. Þjálfunarnámskeiðið þótti takast mjög vel og staðfesti fyrri vísbendingar um að starfsmenn teymisins eru vel áttaðir og áhugasamir um aðferðir MST. Einnig hafa samskipti við barnaverndarstarsfsmenn lofað mjög góðu í umsóknarferli og aðdraganda verkefnisins. Starfsmenn MST-teymisins komu til starfa 27. október sl. og var sú vika notuð í fræðslu og umræður m.a. um hlutverk MST-meðferðar innan ramma íslenskra barnaverndarlaga og vetvangsheimsóknir til ýmissa samstarfsaðila. Stefnt er að því að halda slíkum vetvangsheimsóknum áfram til að efla gagnkvæman skilning lykilaðila og gott samstarf. Einnig er gert ráð fyrir að kynna MST-meðferðina jafnóðum og reynir á samstarf við tiltekna skóla, fagfólk eða stofnanir.
