Foreldraefling
Á málstofu sem haldin var hjá Barnaverndarstofu þann 17. nóvember kynntu aðstandendur miðstöðvar foreldra og barna „Foreldraeflingu“ sem er hópmeðferð sem fer fram einn dag í viku í 14 vikur. Markhópurinn er mæður sem eiga börn 1- 5 ára.Algengar ástæður tilvísana:
• Barn þroskast ekki eðlilega, sýnir vanlíðan eða hegðunarerfiðleika.
• Foreldri myndar ekki heilbrigð tengsl við barn sitt.
• Heimilisofbeldi, geðheilsuvandi eða fíkn foreldris/foreldra.
• Barn er undir eftirliti barnaverndaryfirvalda.
Meðferðin byggist á samþættingu sálgreiningar, tengslakenningar, atferlismótunar og fræðslu en fyrirmyndin er fengin frá Mellow Parenting í Skotlandi. Markmiðið er að meðhöndla vanlíðan mæðra sem eiga ung börn, efla samband þeirra við börn sín og þar með þroska og velferð barnanna. Forsenda fyrir þátttöku í meðferðinni er áhugahvöt mæðra og er líðan og samskipti mæðra við börn sín skoðuð í ljósi reynslu þeirra. Ekki er haldið á lofti ákveðinni uppeldisaðferð heldur er lögð áhersla á íhugun, fjölbreytni og virðingu fyrir ólíkum þörfum ólíkra einstaklinga. Meðferðaraðilar eru ekki í hlutverki sérfræðinga sem koma með lausnir heldur tekur allur hópurinn þátt í að finna nýjar leiðir. Unnið er að því að efla mæður svo þær verði virkir og íhugulir foreldrar.
Meðferðin er tvískipt og fer fram í hópum með tveimur meðferðaraðilum. Fyrir hádegi vinna mæður með persónulega sögu sína, s.s. upprunafjölskyldu, barnæsku, núverandi samband, úrvinnslu tilfinninga og framtíðaráætlanir. Eftir hádegi skoða þær sjálfar sig í móðurhlutverkinu. Í þeirri vinnu eru greind myndbönd sem tekin voru upp á matmálstíma fjölskyldunnar og farið er yfir verkefni sem mæðurnar vinna heima á milli meðferðartíma. Starfsfólk annast börnin á meðan mæðurnar eru í hópvinnunni. Í hádeginu borða allir saman mæður, börn og starfsfólk. Síðan taka allir þátt í leikjum, útivist eða æfingum sem tengjast daglegu lífi fjölskyldunnar (t.d. verslunarferðir). Mæður fá heimaverkefni til að æfa sig í því sem þær hafa lært.
Um er að ræða gagnreynda meðferð sem er metin með myndbandsupptökum og matslistum. Niðurstöður rannsókna í Bretlandi hafa sýnt að samskipti móður og barns batna, það dregur úr hegðunarerfiðleikum barna, móður líður betur og er öruggari uppalandi auk þess sem börnum fer fram í þroska. Við eftirfylgd eftir 18 mánuði hafa enn frekari jákvæðar breytingar komið í ljós.
Áhugasömum er bent á að hafa samband við aðstandendur verkefnisins:
Anna María Jónsdóttir geðlæknir, annam@laekning.is s:6619401
Helga Hinriksdóttir hjúkrunarfr., helgahin@reykjalundur.is s:5852000
Stefanía Arnardóttir hjúkrunarfr., stefania.arnardottir@hhjuk.hg.is s:5131300
Sæunn Kjartansdóttir sálgreinir, saeunn@simnet.is s:5811148