Réttindi unglinga vegna lögregluafskipta
Nýlega féllu tveir dómar um réttindi unglinga vegna lögregluafskipa annars vegar hjá Héraðsdómi Reykjavíkur (mál nr. E-8580/2009) og hins vegar hjá Héraðsdómi Norðurlands eystra (mál nr. E-228/2009). Í báðum dómunum voru einstaklingum, sem voru undir 18 ára aldri þegar atvik áttu sér stað, dæmdar skaðabætur vegna þess að lögregla hafi ekki gætt nægilega vel að rétti þeirra í tengslum við dvöl á lögreglustöð. Voru viðkomandi einstaklingum m.a. dæmdar skaðabætur vegna þess að lögregla tilkynnti ekki um málin til barnaverndarnefnda án tafar.Barnaverndarstofa vekur í þessu sambandi athygli á því að þegar grunur leikur á um að unglingur undir 18 ára aldri hafi gerst sekur um refsiverða háttsemi og hún telur nauðsynlegt að fylgja rannsókn eftir með því að færa ungling á lögreglustöð er lögreglu samkvæmt framangreindum dómum fortakslaust skylt að hafa samband við barnaverndarnefnd, en kveðið er á um þá skyldu í 18. gr. barnaverndarlaga nr. 80/2002. Einnig er ljóst af umræddum dómum að lögregla þarf einnig að bera aðrar ákvarðanir, s.s. um að nauðsynlegt sé að unglingur gisti í fangaklefa, undir barnaverndarnefnd án tafar.
