Námskeið fyrir barnaverndarnefndir
Í september og október sl. efndi Barnaverndarstofa til alls sex heilsdagsnámskeiða fyrir barnaverndarnefndir um skipulag og vinnslu barnaverndarmála. Einnig var starfsmönnum barnaverndarnefnda gefinn kostur að sitja námskeiðið. Þar var farið í uppbyggingu barnaverndarkerfisins, helstu lög og málsmeðferð við könnun og vinnslu barnaverndarmála, úrræði á vegum Barnaverndarstofu o.fl Alls voru haldin þrjú námskeið í Reykjavík, þar af eitt sem einnig var í fjarfundi, auk þess sem haldin voru námskeið á Ísafirði, Akureyri og Egilsstöðum. Námskeið sem þessi eru liður í fræðsluhlutverki Barnaverndarstofu og hafa verið haldin á fjögurra ára fresti í kjölfar sveitarstjórnarkosninga.Námskeiðin voru vel sótt og mættu alls 130 fulltrúar frá 23 barnaverndarnefndum á þau. Starfsmenn Barnaverndarstofu hafa einnig sinnt sérhæfðari námskeiðum fyrir nefndirnar og starfsmenn þeirra og er unnið að námskeiðsáætlun fyrir árið 2011.