Áhættuhegðun íslenskra barna á netinu - Könnun SAFT á netnotkun barna og unglinga á Íslandi
Niðurstöður könnunar á netnotkun barna og unglinga hér á landi sýna fram á að börn eru virkir þátttakendur á netinu og birtist áhættuhegðun með ýmsu móti.
SAFT kynnir niðurstöður könnunar á netnotkun barna og unglinga hér á landi. Könnun SAFT er ætlað að kortleggja notkun barna og unglinga á netinu og öðrum skyldum miðlum en sambærilegar kannanir voru gerðar hér á landi árin 2003, 2007 og 2009. Lagðar voru spurningar fyrir börn og foreldra og var hluti könnunarinnar tileinkaður áhættu á netinu. Niðurstöðurnar staðfesta sem fyrr að börn eru virkir þátttakendur á netinu og mikilvægi þess að fullorðnir í nærumhverfi barna fylgist með netnotkun þeirra og leiðbeini með hegðun á netinu. Fram kom að um helmingur barna hafði einhvern tímann á sl. 12 mánuðum leitað að nýjum vinum á netinu og um 12% höfðu leitað að nýjum vinum tvisvar í viku eða oftar. Um þriðjungur barna höfðu bætt við vinum sem þau höfðu aldrei hitt augliti til auglitis og rúm 4% höfðu samþykkt nýja vini tvisvar í viku eða oftar á sl. mánuðum. Rúmlega 22% höfðu einhvern tímann á sl. 12 mánuðum haft samband við einhvern sem þau höfðu ekki hitt í eigin persónu og um 5% höfðu gert það tvisvar í viku eða oftar. Þá höfðu um 9% barna sent mynd eða vídeó af sér til einhverns sem þau höfðu ekki hitt í eigin persónu og 8% höfðu sent persónulegar upplýsingar t.d. fullt nafn, heimilisfang eða símanúmer til einhvers sem þau höfðu aldrei hitt augliti til auglitis. Niðurstöðurnar sýna að strákar eru líklegri en stelpur til að hafa hitt einhvern augliti til auglitis sem þeir kynntust fyrst á netinu en stelpur eru líklegri en strákar til að hafa verið beðnar að senda mynd af sér nöktum eða í ögrandi stellingum. Sjá nánar fréttatilkynningu SAFT.
