Samanburður á fjölda tilkynninga til barnaverndarnefnda fyrstu sex mánuði áranna 2014 og 2015

15 sep. 2015

Barnaverndarstofa birtir nú samantekt sem felur í sér samanburð á fjölda tilkynninga til barnaverndarnefnda skv. sískráningu nefndanna fyrstu sex mánuði áranna 2014 og 2015. 

Í þessari samantekt er að finna samanburð á fjölda tilkynninga til barnaverndarnefnda skv. sískráningu nefndanna fyrstu sex mánuði áranna 2014 og 2015.  Endanlegar upplýsingar um fjölda tilkynninga koma fram í samtölublöðum barnaverndarnefndanna sem birtast í ársskýrslu Barnaverndarstofu. Einnig er hér að finna upplýsingar um fjölda umsókna um þjónustu til Barnaverndarstofu fyrir fyrstu sex mánuði áranna 2014 og 2015.

Tilkynningar til barnaverndarnefnda

Tilkynningum til barnaverndarnefnda fækkaði um rúmlega 9% á fyrstu sex mánuði ársins 2015 miðað við fyrstu sex mánuði ársins 2014. Fjöldi tilkynninga fyrstu sex mánuði ársins 2015 var 4.346 tilkynningar, en 4.787 fyrir sama tímabil árið á undan. Tilkynningum á höfuðborgarsvæðinu fækkaði  um 5,3% en fækkunin var 17,6% á landsbyggðinni. Þess ber að geta að tilkynning til barnaverndarnefndar verður að barnaverndarmáli ef tekin er ákvörðun um könnun máls í kjölfar tilkynningarinnar.

Flestar tilkynningar á fyrstu sex mánuðum ársins 2015 voru vegna vanrækslu eða 38,5% tilkynninga. Hlutfall tilkynningar fyrstu sex mánuði ársins 2014 vegna vanrækslu var 39,8%. Hlutfall tilkynninga vegna ofbeldis var 26,5% fyrir sama tímabil á árinu 2015, en 22,3% árið á undan. Hlutfall tilkynninga vegna áhættuhegðunar barna var 34,3% fyrir sama tímabil á árinu 2015, en 37,3%  árið á undan. Hlutfall tilkynninga þar sem að heilsu eða lífi ófædds barns var stefnt í hættu var 0,6% á fyrstu sex mánuðunum bæði árin. Tilkynningum um vanrækslu og áhættuhegðun barna fækkaði, en tilkynningum um ofbeldi fjölgaði.

Hlutfall tilkynninga þar sem tilkynnt var um vanrækslu og fram kom að foreldrar voru í áfengis-og/eða fíkniefnaneyslu var 11,8% á fyrstu sex mánuðum ársins 2015, en 10,3% fyrir sama tímabil árið á undan. Í tilkynningum um ofbeldi var hlutfall tilkynninga þar sem um heimilisofbeldi var að ræða 7,3% á fyrstu sex mánuðum ársins 2015 en 5,2% fyrir sama tímabil árið á undan.  Flestar tilkynningar bárust frá lögreglu, eða 41,7% á fyrstu sex mánuðum ársins 2015, hlutfallið var 44,3% fyrir sama tímabil árið á undan.

Umsóknir til Barnaverndarstofu

Umsóknum um meðferð fækkaði á fyrstu sex mánuðum ársins 2015 miðað við sama tímabil árið á undan. Umsóknum um Stuðla fækkaði úr 24 umsóknum í 14 umsóknir, umsóknir um önnur meðferðarheimili (Laugaland, Lækjarbakka og Háholt) voru 11 bæði árin og umsóknum um MST fækkaði úr 47 umsóknum í 44 umsóknir. Fjölkerfameðferð (MST) snýr að fjölskyldum unglinga með fjölþættan hegðunarvanda sem kominn er á það alvarlegt stig að vistun unglings utan heimilis er talin koma til greina. Markhópurinn eru unglingar á aldrinum 12-18 ára og fer meðferðin fram á heimilum fólks. Frá því í febrúar 2015 hefur þjónusta MST náð til alls landsins, en áður var þjónustusvæðið miðað við 60 min. akstursfjarlægð frá Reykjavík. Fleiri umsóknir um Stuðla og MST voru vegna stúlkna fyrstu sex mánuði ársins 2015 en um langtímameðferðarheimili voru umsóknir fyrir drengi fleiri.

Beiðnum til Barnaverndarstofu um fósturheimili fjölgaði úr 67 í 70 á umræddu tímabili. Beiðnum um tímabundið og varanlegt fóstur fækkaði en beiðnum um styrkt fóstur fjölgaði. Flestar beiðnir voru frá Reykjavík á fyrstu sex mánuðum bæði árin, en beiðnum fækkaði frá  landsbyggðinni á fyrstu sex mánuðum ársins 2015 miðað við sama tímabil árið á undan

Í Barnahúsi fjölgaði rannsóknarviðtölum úr 92 á fyrstu sex mánuðum ársins 2014 í 136 á fyrstu sex mánuðum ársins 2015. Skýrslutökum fjölgaði úr 27 í 71 milli ára en könnunarviðtöl voru 65 bæði árin. Greiningar- og meðferðarviðtölum fækkaði úr 68 viðtölum í 65 viðtöl. Stúlkur voru í meirihluta þeirra barna sem komu í rannsóknarviðtöl, 70,6% á fyrstu sex mánuðum ársins 2015, en 69,6% fyrir sama tímabil árið á undan.

Vistanir á neyðarvistun Stuðla voru 87 á fyrstu sex mánuðum ársins 2015 en 99 fyrir sama tímabil árið á undan. Vistunardögum fækkaði úr 588 í 562. Fjöldi einstaklinga var 50 á fyrstu sex mánuðum ársins 2015 en 52 fyrir sama tímabil árið á undan og voru fleiri drengir bæði árin.

Hér má finna töflur sem sýna sundurliðun á þessum samanburði.


Nýjustu fréttir

03. des. 2020 : Greining á tölulegum upplýsingum frá barnaverndarnefndum

Tilgangur greiningarinnar er að leggja mat á hvort og þá hvaða áhrif COVID-19 faraldurinn hefur haft á tilkynningar til barnaverndarnefnda. Sambærilegar greiningar hafa áður verið gerðar vegna mars til september 2020.

Lesa meira

05. nóv. 2020 : Greining á tölulegum upplýsingum síðustu níu mánaða

Barnaverndarstofa hefur tekið saman fjölda tilkynninga til barnaverndarnefnda skv. sískráningu fyrstu níu mánuði 2020 og borið saman við sama tímabil árin 2019 og 2018. Endanlegar upplýsingar um fjölda tilkynninga koma fram í samtölublöðum barnaverndarnefndanna sem birtast í sérstakri skýrslu sem gefin er út árlega. Einnig er að finna upplýsingar um fjölda umsókna um þjónustu til Barnaverndarstofu á fyrstu níu mánuðum áranna 2018, 2019 og 2020.

Lesa meira

21. sep. 2020 : Viðbrögð Barnaverndarstofu vegna Covid-19 veirunnar

Afgreiðsla í Borgartúni 21 verður lokuð en tekið er á móti pósti. Símsvörun í 530 2600 frá kl. 10 til 12 og 13 til 15. Alltaf hægt að senda netpóst á bvs@bvs.is

Lesa meira

07. sep. 2020 : Samanburður á tölum fyrstu sex mánuði 2018 – 2020

Barnaverndarstofa hefur tekið saman tölur vegna fyrstu 6 mánuði ársins og borið saman við tölur frá árinu 2018 og 2019

Lesa meira

01. sep. 2020 : Greining á tölulegum upplýsingum frá barnaverndarnefndum

Barnaverndarstofa hefur greint tölur sem borist hafa frá barnaverndarnefndum vegna tilkynninga sem bárust í júní og júlí 2020 og borið þær saman við tölur í maí 2020 og tölur frá 1. janúar 2019 til og með 29. febrúar 2020

Lesa meira

Þetta vefsvæði byggir á Eplica