Leiðbeiningar um innleiðingu á lögum um samþættingu þjónustu í þágu farsældar barna
Samþætting þjónustu í þágu farsældar barna: Kynning, leiðbeiningar og eyðublöð.
Sveitarfélög fara yfir og skrá þjónustu fyrir börn og barnafjölskyldur í sveitarfélaginu, bæði á vegum sveitarfélaga og annarra stofnana, s.s. heilbrigðisþjónustu ofl. Barna- og fjölskyldustofa heldur utan um skrá yfir úrræði í hverju sveitarfélagi eða landsvæði.
Eftirfarandi þjónustuveitendur tilnefna tengiliði og málstjóra fyrir börn og foreldra, eftir því sem við á: Félagsþjónusta/barnavernd, heilbrigðisþjónusta og skólaþjónusta.
Skoða hvernig þjónustuveitendur geti unnið sem best saman með áherslu á snemmtæka nálgun og stutt þannig við hlutverk tengiliða og málstjóra. Skýra hlutverk tengiliða, málstjóra og hugmyndafræði samþættingar.
Ávallt þarf að leggja mat á tilgang og nauðsyn á miðlun upplýsinga á grundvelli samþættingar þjónustu í þágu farsældar barna. Þetta á m.a. við um trúnað og miðlun upplýsinga milli kerfa. Því er mikilvægt að persónuverndarfulltrúar þjónustuveitenda séu með í verkefninu, sem er einnig í höndum Barna- og fjölskyldustofu.
Gert er ráð fyrir að þar sem lögin hafa þegar tekið gildi séu þjónustuveitendur þegar farnir að vinna á grundvelli samþættingar, taka á málum snemma, vinna saman að lausn mála osfrv.
Tryggja upplýsingar, fræðslu og aðgang fyrir börn og foreldra að tengiliðum og málstjórum og að upplýsingar séu aðgengilegar á heimasíðum þjónustuveitenda.
Þjónustuveitendur kortleggja þörf fyrir fræðslu til tengiliða og málstjóra í samvinnu við Barna- og fjölskyldustofu.
Sveitarfélög hugi að skipun svæðisbundins farsældarráðs í samvinnu við önnur sveitarfélög á svæðinu sbr. 5.gr. laga um samþættingu þjónustu í þágu farsældar barna. Þar kemur fram að sveitarfélög skipa svæðisbundin farsældarráð sem eru vettvangur fyrir samráð um farsæld barna. Þar eiga sæti fulltrúar svæðisbundinna þjónustuveitenda á vegum ríkis og sveitarfélaga.
Sveitarfélögum og öðrum þjónustuveitendum er heimilt að hafa samvinnu um ofangreind verkefni. Heimilt er að mynda sérstök þjónustusvæði um verkefnin.
