Kaup á Foster Pride
Barnaverndarstofa hefur nú fest kaup á Foster Pride, sem er bandarískt kennsluefni í fósturmálum sem hefur verið að ryðja sér til rúms á Norðurlöndunum og víðar. Foster Pride er kennsluefni sem varðar vinnubrögð barnaverndarnefnda í fósturmálum, svo og undirbúningsnámskeið fyrir fósturforeldra áður en þeir taka börn í fóstur. Námskeiðið inniheldur einnig heildstætt úttektarferli og mati á hæfni fósturforeldra sem byggist á viðtölum við þá á heimilum þeirra.Foster Pride námskeiðið er byggt upp með skipulegt kennslufyrirkomulag í huga. Fyrirlestraformið er í lágmarki, hópvinna er mikið notuð og hagnýtar aðferðir meira notaðar en fræðileg umræða. Undirbúningsmenntun er mjög viðamikil og tekur yfir 10 vikur og er í heimabyggð fósturforeldranna. Markmiðið með að innleiða Pride er að gera fósturforeldra hæfari til að takast á við hlutverk sitt.
Hildur Sveinsdóttir, sem hefur haft umsjón með fósturmálum hjá Barnaverndarstofu frá upphafi, er nú í leyfi frá daglegum störfum í því skyni að þýða og staðfæra Foster Pride. Hún mun koma aftur til starfa um miðjan júlí á meðan mun Guðbjörg Edda Hermannsdóttir, félagsráðgjafi, hafa umsjón með fósturmálum á Barnaverndarstofu.
Verkefnið er samstarfsverkefni Barnaverndarstofu og Landssamtaka vistforeldra í sveitum. Framleiðnisjóður landbúnaðarins, Starfsmenntunarsjóður félagsmálaráðuneytisins og sjóður til styrktar atvinnumálum kvenna hafa styrkt verkefnið.
