Meðferð í nærumhverfi á grunni ART-þjálfunar
Barnaverndarstofa hefur gert samning við sveitarfélagið Árborg til tveggja ára um meðferðarúrræði utan stofnana á grundvelli 6. mgr. 7. gr. barnaverndarlaga. Meðferðin er fyrir unglinga með hegðunarerfiðleika, þ.m.t. vímuefnavanda, og fjölskyldur þeirra. Meðferðin fer alfarið fram á heimavelli fjölskyldunnar og er byggð á grunni ART-þjálfunar (félagsfærni, sjálfstjórn og siðferðileg umræða - Aggression Replacement Training) og veitt í formi einstaklings- og fjölskylduráðgjafar, sem og samhæfingar bjargráða í umhverfi fjölskyldunnar.Þjónustusvæði verkefnisins nær til umdæma barnaverndarnefndar Árborgar, Hveragerðis, Ölfuss, uppsveita Árnessýslu & Flóa og Rangárvalla- og V-Skaftafellssýslu. Heimilt er að taka til meðferðar fjölskyldur utan þessa svæðis sé það gerlegt að mati verkefnissstjórnar og innan þeirra fjárheimilda sem veittar eru til verkefnisins.
Skólaskrifstofa Suðurlands hefur tekið að sér framkvæmd meðferðarinnar samkvæmt sérstökum samningi við Fjölskyldumiðstöð Árborgar. Skipuð er sérstök verkefnisstjórn sem í sitja verkefnisstjóri ART á Suðurlandi sem jafnframt er formaður, verkefnisstjóri félagslegrar ráðgjafar hjá Fjölskyldumiðstöð Árborgar, framkvæmdasstjóri Skólaskrifstofu Suðurlands og sálfræðingur frá Heilbrigðisstofnun Suðurlands.
Á næstunni mun Fjölskyldumiðstöð Árborgar í samvinnu við Skólaskrifstofu Suðurlands halda kynningu á framkvæmd þjónustunnar fyrir félagsmálastjóra og barnaverndarstarfsmenn á þjónustusvæðinu. Þar munu m.a. verða útskýrðir verkferlar varðandi umsóknir osfv. en umræddur samningur gerir ráð fyrir að barnaverndarnefndir á ofangreindu þjónustusvæði sæki um meðferð til verkefnisstjóra ART á Suðurlandi (hjá Skólaskrifstofu Suðurlands) sem fer með daglega stjórnun meðferðarinnar.