Barnahús 25 ára
Í dag miðvikudaginn 1. nóvember fagnar Barnahús aldarfjórðungs afmæli. Barnahús er fyrirmynd margra landa að barnvænni nálgun í réttarvörslukerfinu. Barnahús sinnir málefnum barna sem eru þolendur kynferðisofbeldis en einnig þolendur líkamlegs ofbeldis. Hugmyndafræði Barnahúss er að börn sem eru þolendur ofbeldis fái alla þjónustu undir einu og sama þakinu hvort heldur sem þau eru að fara í skýrslutöku fyrir dómi, greiningu og meðferð eða fara í læknisskoðun. Mikilvæg þekking á kynferðisbrotum gagnvart börnum hefur safnast saman á þessum 25 árum sem Barnahús hefur verið starfrækt.
Frá því Barnahús var opnað hafa þúsundir barna notið þar þjónustu og fengið áfallameðferð vegna þeirra afleiðinga sem ofbeldi felur í sér. Barnahús er nú starfandi undir sama nafni í fjölda annarra Evrópuríkja og sérfræðingar Barnahúss hafa lagt ótakmarkaðan tíma í aðstoð við innleiðingu Barnahúsa víðs vegar um Evrópu. Fjöldi erlendra gesta leggur leið sína árlega til Íslands í þeim tilgangi að heimsækja Barnahús og læra af þeim sérfræðingum sem þar starfa.
Ráðuneytið fjármagnaði í ár kortlagningu á Barnahúsum í Evrópu í samstarfi við Evrópuráðið en sú skýrsla er væntanleg á næstu dögum.
