Barnaverndarstofa biður konur afsökunar sem voru vistaðar á Laugalandi (áður Varpholt)
Barnaverndarstofa hefur farið í gegnum öll þau gögn sem til eru um starfsemina á Laugalandi. Sú skoðun hefur leitt í ljós að á starfstíma heimilisins komu fram vísbendingar um óeðlilegar starfsaðferðir. Þessum vísbendingum hefði verið hægt að fylgja eftir og bregðast við með markvissari hætti en gert var. Gögnin sýna einnig að á heimilinu var unnið út frá hugmyndafræði sem þótti góð og gild á sínum tíma en samstaða er á meðal sérfræðinga í dag að sé úrelt og eigi alls ekki við þegar unnið er með börnum sem glíma við margþættan vanda og þurfa umfram allt stuðning og aðstoð.
Miklar breytingar hafa orðið á faglegu starfi meðferðarheimila hér á landi, sem og eftirliti með þeim, á síðustu 10-15 árum. Engu að síður telur Barnaverndarstofa rétt, í framhaldi af þeim upplýsingum sem fram hafa komið varðandi starfsemi Laugalands, að yfirfara verkferla er varðar eftirlit með börnum sem vistuð eru á meðferðarheimilum og er sú vinna hafin. Mikilvægt er að tryggja að börn treysti sér til að greina frá upplifun sinni og aðbúnaði þar á meðan vistun stendur og að brugðist sé við þeim upplýsingum með fullnægjandi hætti.
Heiða
Björg Pálmadóttir,
forstjóri Barnaverndarstofu
